Kan chief minister chuan 'change' a thupui ang chiahin change kan hmu leh dawn ta e. A tha zawk ang nge tha zawk lovang tih erawh hriat a har. Change chungchanga ka ngaih ve dan ka blog a ka ziah hi a pawi em em lo turah kan ngai ve tawp a. Kum tam tak liam hnuah ka la dam te anih ngai chuan keimah ngei pawhin heng hun laia ka ngaihdan te hi chhiar nuam ka la ti ngei turah ngaiin kan ziak ve tawp teh ang.
Newspaper, television, facebook, whattsap ah te kan hmu a, MLTP act chu hlih a lo ni ta a. Hemi chungchangah hian ngaihdan ziak an tam a, ngaihdan pawh a tam ngei. Kei chuan an hlip hi pawi ka ti hran lo, hlih loh pawhin zu a tam em em tho a, tul lovah mizoram pawisa state dangah zu lei nan zu hman thin a ni a. Man an lo nih hlauh phei chuan engmah lovah a chang a. Awmze nei lovin Mizoram pawisa state dangah kan zuk transfer mai mai ah ka ngai. Chu bakah mi thenkhat ten zu manah pawisa a let 2 dawn dawn hlepin an sumdawng reng tho a, Mizo mipui zu in duh an tam si, khangte kha rawkin an awm ka ti lo thei lo. Mizo an ni a, mizo an nih angin zu in duh mi pawh lo ni se, mizo an nihna a bo chuang lo. Chuvangin kan mizopuite rawka an awm ai chuan a man ngaia an lei mai kha a tha ka ti. Chutih rualin chhiatpui tur an awm ngei ang tih chu a rin theih. Chuvangin a chhiatpui turte venna tur chu sawrkarin theihtawp a chhuah turah in ngai teh ang.
Change dang leh Mizorama kan hmuh tur ni a lang chu school tan hma a ni. Hemi chungchang pawh ngaihdan a tam e. A mimal takin tan hma ka duh lo, a chhan pawh menrei ching ka nih vang mai a ni a. Mahsela mithiamte rawna rawtna hi siam anih avangin kan thatpui tur anih chuan kan zawm ve mai tur a ni tih hi ka ngaihdan a ni. Tin, mithiamten a that dan tur kawng hrang hrang an sawi te kha a dik ngei pawhin ka ring. Chuvang chuan huphurh tak tho siin hman ka chak tawh hle mai.
Change pawm harsa ti tak mi ka ni a. In adjust zung zung ka harsat thin. Amaherawhchu awm ngai renga awm hian hmasawnna a thlen lo tih ka chiang ve tlat. Chuvangin Mizoram mipuite pawh hian sorkarin change a siam te hi thlawp thiam hram hram tum ila ka ti thin. Sawiselte chu a thiang a, kan ngaihdan kan sawi ve a ni mai a. Mahsela a do zawnga a engamah hmaa lo beih chiam hi sim a tha ka ti khawp mai. Keimahni thlan tlin ngei kan sawisel thin hian kan intimualpho mai mai em le ka ti thin. Kan thlan tlin annih avangin explanation tha tak nen thil thar an introduce hi chu Mizote hian thlawp hram hram zel ang u. A lo tha ta lo anih leh a chhan tha tak nen kan duhlohna kan auchhuahpui leh mai zawk ang a. Citizen tha kan nih theihnan kan thlan tlin sawkar apiang thlawp hi i in zir thar teh ang u.
Janet Lalmawipuii Ralte
